Развіцце грашовых сістэм

Малады і амбітны Дзмітрый-Карыбут Альгердавіч таксама не застаўся ўбаку ад «эмісійнай ліхаманкі», што ахапіла Севершчыну. Упершыню манета, атрыбутаваная гэтаму ноўгарад-северскаму князю, была апублікаваная ў 1868 годзе графам Кёнэ. Ён прачытаў на манеце кірылічны надпіс Д КОРНБТВА, змешчаны вакол мяча з аднаго боку манеты (з другога боку было наследаванне арабскаму пісьму). У 1913 годзе іншы расійскі нумізмат М. Догель апісаў падобную манету, якая розніцца ад першай наяўнасцю княскага знака. З дзвюх апісаных манет Карыбута да сённяшняга часу захавалася толькі адна. Яна знаходзіцца ў Эрмітажы ў Санкт-Пецярбургу. Болей манет падобнага тыпу не знаходзілі. Існуе думка, што да сведчанняў барона Кёнэ трэба ставіцца з пэўнай доляй скептыцызму, на што ўказваў яшчэ А. Кіркор, пішучы ў сваёй «Манетнай справе ў Літве» (1869), што «нататкі п. Кёнэ могуць нават увесці ў зман менш знаёмага з тутэйшай гісторыяй».

Аднак існаванне сапраўдных дзенгаў падобнага тыпу цяжка аспрэчыць, бо матывы гэтых манет добра кладуцца ў канву манетнай справы ўсходу Вялікага княства ў апошняй чвэрці XIV стагоддзя. Яны наўрад ці маглі быць прыдуманыя, бо на той час іншыя манеты ўсходу Вялікага княства яшчэ не атрымалі належнай атрыбуцыі. Можна крытычна ставіцца да дакладнасці пададзенай расійскімі даследнікамі інфармацыі, але няможна ставіць пад сумнеў яе агульны змест.

Першае ўпамінанне пра Дзмітрыя-Карыбута датуецца толькі 1381 годам, калі ён, ужо як ноўгарад-северскі князь, адмовіўся прысягнуць Кейстуту, што захапіў велікакняскі пасад. Верагодна, пасля спусташэння Севершчыны Дзмітрыем Маскоўскім у 1380 годзе і пераходам да яго на службу некаторых удзельных северскіх князёў Карыбут атрымаў вялікія землі на Севершчыне, што зрабіла яго адным з найбуйнейшых феадалаў у ВКЛ.

Загадкавым ёсць з'яўленне на адной з манет Карыбута княскага знака, якім карысталіся князі Нарымонтавічы ў канцы 1360—1370-ых гадоў. Найболып верагодна, што пры выразанні штэмпеля манетнымі майстрамі Карыбута ў якасці прататыпа былі ўзятыя старадубскія манеты Патрыкея Нарымонтавіча, якія, безумоўна, былі вядомыя ў суседнім Ноўгарад-Северскім удзеле. Гэтыя пробныя, ці малалікія, манеты Дзмітрыя-Карыбута маглі паходзіць прыкладна з 1380 года.

Зараз на сайце

Зараз на сайце 3 гостя.

Лічыльнікі

Rating All.BY

Статыстыка

-