Талеры на Беларусі

У 1580 годзе на паседжанні сейма ў Варшаве была выдадзеная эпахальная манетная ардынацыя Стафана Баторыя, што ўзаконіла выбіццё наступных гатункаў манет: талераў, паўталераў, шастакоў, траякоў, грошаў, паўгрошаў, шэлегаў, трацякоў і пенязяў па польскай стапе. Былая адметная грашовая сістэма Вялікага княства, заснаваная на трох срэбных наміналах, дэ-юрэ перастала існаваць. Новыя літоўскія талеры па выкананні і метралагічных характарыстыках меліся адпавядаць класічным цэнтральнаеўрапейскім (нямецкім) талерам. Ім надаваўся курс у 35 грошаў польскіх. Аднак паўталеры ніколі не былі выбіваныя, адно унікальны талер асаблівага кшталту (наміналам у паўтара гульдэны) вядомы з 1580 года. Толькі ў 1585 годзе вельмі абмежаваным накладам былі ўрэшце выбітыя ўласна талеры нямецкага ўзору, хоць і трохі лягчэйшыя. Гэтыя першыя ў поўным сэнсе талеры ВКЛ сталіся... апошнімі. Ніколі больш эмісіі талераў у Вільні не ўзнавіліся. У той жа час распачаліся эмісіі талераў Стафана ў Польшчы і Нагібаніі, што набылі больш шырокае распаўсюджанне, у тым ліку і на Беларусі. Тым не менш і яны цяпер адносяцца да досыць рэдкіх манет.

6-залатоўкавы талер Станіслава Аўгуста (1795)

Болып-менш паспалітай манетай на рынках Вялікага княства талер стаў толькі ў XVII стагоддзі. У 1608 годзе пасля перапынку быў ізноў адчынены Быдгашчанскі манетны двор у Польшчы, што хутка сталася галоўнай вытворчай пляцоўкай Польскага Каралеўства. У ёй упершыню былі выбітыя польскія чвэрцьталеры — орты, якія з самага пачатку 1620-ых гадоў сталіся даволі пашыраным грашовым гатункам на рынках Рэчы Паспалітае і беларускіх земляў у прыватнасці. Праўда, трошкі раней орты пачалі выбіваць у вялікіх колькасцях у вольным горадзе Гданьску, што традыцыйна меў трывалыя гандлёвыя сувязі з Заходняй Еўропай, перад усім з Германіяй і Нідэрландамі. У той жа час талеры з вышэйзгаданых краёў пачалі шырокім фронтам паступаць у краіну галоўным чынам акурат праз Гданьск.

Зараз на сайце

Зараз на сайце 2 гостя.

Лічыльнікі

Rating All.BY

Статыстыка

-